team jeevandeep 18/01/2025 sthanik-batmya Share
कल्याण : कल्याण पश्चिमेतील कल्याण डोंबिवली महानगरपालिका मुख्यालयाला लागून असलेल्या सुभाष मैदानात इनडोअर गेमसाठी हॉल बांधण्यात येणार असून या हॉलला सर्व खेळाडुंनी विरोध केला असून आहे त्या मैदानात हा हॉल न उभारता मैदानाव्यतिरिक्त इतर जागेत हा हॉल उभारण्याची मागणी करण्यात येत आहे. त्यामुळे हे सुभाष मैदान वाचविण्यासाठी महाराष्ट्र नवनिर्माण सेनेचे अहिल्याबाई चौक शाखा अध्यक्ष संदिप पंडित यांच्या वतीने सुभाष मैदान बचाव मोहीम छेडण्यात आली असून जनआंदोलनाचा इशारा दिला आहे.
ऐतिहासिक कल्याण नगरीत सर्वसामान्यांसाठी 'सुभाष मैदान' हे एकमेव मोकळा श्वास घेण्याची जागा उरलेली आहे. या मैदानात क्रिकेट, कबड्डी, फुटबॉल असे नानावीविध खेळ खेळले जातात. सर्वसामान्यजण तेथे मॉर्निंग वॉक, व्यायाम तसेच धकाधकीच्या जीवनातून थोडा विरंगुळा म्हणून येत असतात. मुळात सुभाष मैदान तसे फार मोठे मैदान नाही. आता यात 'इनडोअर गेम' साठी म्हणे 'मल्टीपर्पज हॉल' बांधण्याचा घाट महापालिका वर्तुळात सुरू असल्याची चर्चा आहे.
नक्षत्र उ‌द्यानाच्या गेट पासून मैदानाच्या ३५ टक्के या दरम्यान हा हॉल होणार आहे. पण यामुळे मुळातच छोटे क्षेत्रफळ असलेल्या सुभाष मैदानाची जागा आक्रसणार आहे. परिणामी अत्यंत गैरसोय होणार असा जनअक्रोश आहे. या विकास यात्रेला, योजनांना, सुविधांना विरोध नाही. पण हे नियोजन करताना नागरिकांची गैरसोय तसेच नुसते अडथळे होऊ नयेत. 'मल्टीपर्पज हॉल' अन्यत्र व्हावा, ज्यामुळे सुभाष मैदानाची जागा विनाकारण आक्रसली जाऊ नये ही मनसेची भूमिका आहे.
सर्वसामान्य नागरिकांचे मन भूमिका याचा सारासार विचार न करता सुभाष मैदानातच 'मल्टीपर्पज हॉल' हा उपक्रम महापालिका लादणार असेल तर नाईलाजास्तव जन आंदोलन करणे भाग पडेल याची दखल महानगरपालिकेने घ्यावी असा इशारा मनसेचे शाखा अध्यक्ष संदिप पंडित यांनी दिला आहे.
