team jeevandeep 30/12/2024 sthanik-batmya Share
कल्याण : कल्याण डोंबिवली महानगरपालिकेच्या शिक्षण विभागामार्फत कल्याण पश्चिमेतील अचिव्हर्स महाविदयालयात मनपास्तरीय विज्ञान प्रदर्शन आयोजन करण्यात आले असून, या प्रदर्शनाचे उद्घाटन मुंबई विद्यापीठाचे माजी कुलगुरु तथा बिर्ला महाविद्यालय कल्याणचे संचालक, डॉ.नरेशचंद्र यांनी केले.
विज्ञान प्रदर्शनामध्ये शालेय विद्यार्थ्यांकडून वाहतुक व दळणवळण ट्रॅफिक, घनकचरा व्यवस्थापन (कचरा वर्गीकरण), वायु प्रदुषण इ. प्रकल्प सादर करण्यात आले. यामध्ये नागरिकांना भेडसावणा-या समस्यांचे निराकरण कसे करावे, याबाबत उपाययोजना शोधण्याचे सादरीकरण प्रकल्पांच्या माध्यमातून करण्यात आले.
या नाविन्यपूर्ण विज्ञान प्रकल्पांची पाहणी करताना हे महानगरपालिकास्तरीय प्रकल्प राज्यस्तरापर्यंत जावेत यासाठी डॉ.नरेशचंद्र यांनी विदयार्थी व शिक्षक यांना शुभेच्छा दिल्या. तर विदयार्थी हे उदयोगाभिममुख व्हावेत यासाठी अचिव्हर्स महाविद्यालयाचे डॉ.महेश भिवंडीकर यांनी मार्गदर्शन केले आणि विदयार्थ्यांच्या सद्यपरिस्थितीवर पर्यावरण पुरक प्रकल्प व विदयार्थी कल्पकता यांचे कौतुक केले.
यावेळी शिक्षण विभागाचे उपआयुक्त प्रसाद बोरकर, प्रशासन अधिकारी रमेश चव्हाण, शिक्षणाधिकारी विजय सरकटे व इतर मान्यवर उपस्थित होते. या कार्यक्रमाचे आभार प्रदर्शन प्रशासन अधिकारी रमेश चव्हाण यांनी केले. विज्ञान प्रदर्शन हे 2 दिवस पालक-विद्यार्थ्यांसाठी खुले राहणार आहे.
