team jeevandeep 13/01/2025 sthanik-batmya Share
कल्याण : मकर संक्रांतीचे औचित्य साधून पतंगबाजी करण्यात येते. मात्र हि पतंगबाजी करतांना नायलॉन मांजा वापरल्याने अनेकांना इजा होते, अपघात होऊन अनेकांना आपला जीव देखील गमवावा लागला आहे. तर याचा फटका सर्वात जास्त पक्षांना देखील बसत असून या नायलॉन मांज्यामुळे अनेक पक्षी देखील मृत्यूमुखी पडत असतात. त्यामुळे नायलॉनचा मांजा वापरण्यास शासनाने बंदी घातली असून तरी देखील हा नायलॉन मांजा बाजारपेठेत सर्रासपणे विकला जात आहे. अशा या नायलॉन मांजा विकणाऱ्या विक्रेत्यांवर कल्याण पोलिसांनी कारवाई केली आहे.
कल्याण परिमंडळ 3 चे पोलिस उपायुक्त अतुल झेंडे यांच्या सुचनेनुसार कल्याण डोंबिवलीतील पोलीस ठाण्यात नायलॉन मांजा बाबत कारवाई करण्यात आली. यामध्ये कोळशेवाडी पोलिसांनी 1, विष्णुनगर पोलिसांनी 1, खडकपाडा पोलिसांनी 2, बाजारपेठ पोलिसांनी 1, महात्मा फुले पोलिसांनी 1 अशा एकूण 6 केसेस करण्यात आल्या असल्याची माहिती पोलिस उपायुक्त अतुल झेंडे यांनी दिली.
