Team Jeevandeep 16/09/2024 sthanik-batmya Share
कल्याण – कल्याण डोंबिवली पालिका प्रशासनाने पालिका हद्दीतील सिमेंट काँक्रिट रस्त्यांची साफसफाई करण्यासाठी चार यांत्रिकी वाहने खरेदी करण्याची प्रक्रिया निविदा पध्दतीने पूर्ण केली आहे. लवकरच ही वाहने पालिकेत दाखल होणार आहेत. या यांत्रिक वाहनांच्या साहाय्याने कल्याण, डोंबिवलीतील सिमेंट काँक्रिट रस्त्यांची साफसफाई केली जाणार आहे.
पालिका हद्दीतील सिमेंट काँक्रिट रस्ते यांत्रिकी वाहनाने सफाई करण्यात यावेत. यामुळे या रस्त्यांवरील सफाई कामगारांचे पालिकेचे मनुष्यबळ इतर भागात वापरात येईल, असा आयुक्त डाॅ. इंदुराणी जाखड यांचा प्रस्ताव होता. आयुक्तांच्या आदेशावरून पंधराव्या वित्त आयोगाच्या निधीतून स्वच्छ शहर लेखाशीर्षकांतर्गत ही चार यांत्रिकी वाहने खरेदी करण्याचा निर्णय घेण्यात आला. ऑनलाईन माध्यमातून जेम संकेतस्थळावर ही निवीदा प्रक्रिया पार पडली. स्पर्धात्मक निवीदा प्रक्रियेतून पुणे येथील मे. कॅम ॲव्हिडा कंपनीला रस्ते सफाई कामासाठी यांत्रिकी वाहने खरेदी करण्याचा कार्यादेश देण्यात आला.
ही वाहने खरेदीची प्रक्रिया सुरू असून, लवकरच ही वाहने पालिकेत दाखल होणार आहेत, असे आयुक्त डॉ. इंदुराणी जाखड यांनी सांगितले. या वाहनांची उपप्रादेशिक परिवहन कार्यालयात नोंदणी करून, मग ही वाहने प्रत्यक्ष साफसफाई कामासाठी रस्त्यावर उतरविण्यात येणार आहेत.
यांत्रिकी वाहने
रस्ता सफाई यांत्रिकी वाहन हे साडे सहा घनमीटर क्षमतेचे आहे. ते नैसर्गिक वायूवर चालणारे आहे. त्यामुळे पर्यावरणाचा समतोल राखण्यात हे वाहन महत्वाची भूमिका बजावणार आहे. अत्याधुनिक तंत्रज्ञान या वाहनात आहे. या वाहनाच्या मागील बाजूस सफाईसाठी दोन दाते (ब्रश) असतील. दोन्ही चाकांच्या मध्यभागी चेसीसखाली दोन गोलाकार चक्राकार पध्दतीने फिरणारे दोन दाते (ब्रश) असणार आहेत. वाहनाच्या पाठीमागील बाजूस एक मोठी वाहिका जोडलेली आहे. ही वाहिका रस्त्याच्या कडेला उभ्या असलेल्या वाहनांखालील, अडगडळीच्या जागेतील कचरा प्रखर दाबाने वाहिकेच्या माध्यमातून यंत्रामध्ये खेचून घेईल. या वाहनांंमुळे रस्त्यांवरील धुळीवर नियंत्रण ठेवणे शक्य होणार आहे. या वाहनांवर एक चालक, तीन कामगार सोबत असतील. या यांत्रिकी वाहनांचा अधिकाधिक वापर रात्रीच्या वेळेत करण्याचे पालिकेचे नियोजन आहे. या स्वच्छतेच्या कामावर घनकचरा उपायुक्तांसह स्वच्छता निरीक्षक, मुकादम ही यंत्रणा देखरेखीसाठी असणार आहे.
या यांत्रिकीकरणामुळे ज्या काँक्रिट रस्त्यांवर यापूर्वी सफाई कामगारांकडून सफाई केली जात होती. त्या रस्त्यांवरील कामगार इतर भागात फिरवणे पालिकेला शक्य होणार आहे.
कल्याण डोंबिवली पालिका हद्दीतील ५४ किमी लांबीचे काँक्रिट रस्ते यांत्रिकीकरणाने सफाई करण्याचे नियोजन केले आहे. ही यांत्रिकी वाहने लवकरच पालिकेत दाखल होतील. या वाहनांमुळे सफाई करताना धूळ आणि अन्य घटक हवेत उडणार नाहीत. त्यामुळे श्वसन विकार आणि इतर आरोग्याच्या समस्या कमी होण्यास साहाय्य होईल. डॉ. इंदुराणी जाखड, आयुक्त
